Antes ang programa ara sa opening sang MassKara Festival, nag hambal si Mayor Greg Gasataya nga magahatag sang pinansyal nga bulig ang siudad sa probinsya sang Cebu, matapos ang mabaskog nga linog sang Martes.
Subong nga adlaw, Si Gasataya nag request sa Sangguniang Panlungsod agud mapadali ang pag proseso sang bulig, kag gilayon ini mahatag sa mga biktima.
Gin-anunsyo man sang alkalde nga magalunsar ang Bacolod sang donation drive para sa mga luyag magbulig sa mga apektado nga pumuluyo sang Cebu.
Suno sa alkalde, bukas ang city government sa mga donasyon halin sa pribado kag publiko nga sector.
Si Governor Eugenio Jose Lacson nagkumpirma man nga ang probinsya sang Negros Occidental ang mapadala man sang bulig didto.