Kagabi sa announcement ni Presidente Rodrigo Duterte ginsiling nga ang Metro Manila, Isabela, Santiago City, Batangas, Iloilo, Tacloban, Lanao Del Sur, Iligan, Davao City kag Davao del Norte na lang mga lugar nga napaidalom sa general community quarantine.
Ang iban nga mga parte sang Pilipinas nalakip na ang Bacolod City kag Negros Occidental ang napaidalom sa gihapon sa modified general community quarantine.
Si Bacolod City Mayor Evelio Leonardia nag siling nga iya na ini nga gina paabot ilabi na nga naga single digit na ang number of COVID-19 cases sa Bacolod sa kada adlaw sang nagligad nga semana kag nag zero sang Domingo.
Sa karon may 74 ka active COVID-19 cases ang Bacolod.
Samtang si Negros Occidental Governor Eugenio Jose Lacson naman nag siling nga bisan pa napaidalom sa mgcq ang probinsya indi dapat mag kumpyansa sa madason nga tuig ilabi na nga may panibag-o nga variance sang virus nga gina siling sang mga experto nga mas makalalaton.
Samtang gina tun-an pa sang probinsya ang pag bakal sang bakuna kontra COVID-19.
Nagalaum ang gobernador nga kun tani ang gobyerno national amo ang maga gasto para sa bakuna sang mga frontliners pati na sang mga kubos.
Kooperasyon ang panawagan sang gobernador para madaug ang away kontra sa COVID-19.