Ginpahayag ni Presidente Rodrigo Duterte sa iya taped address nga ginpagwa sa telebisyon kag social media sini nga aga nga magapabilin sa General Community Quarantine ang Bacolod City tubtub sa Nobyembre 30.
Magluwas sa Bacolod, ginpahayag man sang presidente nga magapabilin man sa GCQ tubtub sa bulan sang Nobyembre ang Metro Manila, Batangas, Iloilo City, Tacloban City, Iligan City kag Lanao del Sur.
Pero suno sa presidente mahimo sa gihapon maka appeal ang local government unit kun luyag nila nga bag- uhon ang ila quarantine status.
Kagabi gintawgan ni Bacolod Mayor Evelio Leonardia si DILG Regional Director Jovi Ingeniero nga amo ang chairman sang Regional IATF para ipahanumdum ang hinyo sang siudad nga pag de-escalate sang quarantine status sini gikan sa GCQ pakadto sa Modified GCQ bangud sang pagnubo sang mga kaso sang COVID-19 sa siudad sini nga bulan sang Oktubre.
Suno sa alkalde, nagpasalig naman si Ingeniero nga iya iga-endorse ang panawagan ni Leonardia sa National IATF.