Sa ika 47 nga Masskara Festival sang Bacolod City ang Gugma Foundation, Inc ang magapamuno sang mga preparasyon para diri.
Ini matapos nga gin-aprubahan na sang Sangguniang Panlungsod sang Bacolod City ang Memorandum of Agreement sa tunga ni Mayor Greg Gasataya kag sang Bacolod Gugma Foundation, Inc.
Ginsiling ni Atty. Marty Go, Secretary to the Mayor, nga sang Agosto 19, sa regular session sang SP una na nga ginpasulod ang amo nga MOA apang gin-defer ini bangud sa mga alegasyon nga wala pa makabayad sa mga supplier kag tinawo sang foundation sang tinalikdan nga MassKara.
Gilayon man nga nagpasa sang tanan nga mga dokumento ang foundation agud pamatud-an nga wala na sila sang unsettled business, rason nga sang Agosto 26, sa regular session, gin-aprubahan na ini sang SP.
Sa idalum sang amo nga kasugtanan, maga assist lamang ang siudad sa tanan nga mga aktibidad, apang ang Gugma Foundation na ang mahikot sang tanan.
Pagapangunahan ni Rodney Mitz Ascalon ang ika 47 nga MassKara bilang Festival Director.
Una na nga ginpahayag sang foundation nga "Share the Smile, Celebrate Gugma" ang mangin tema sa sini nga tuig kag indi na sa Paglaum Sports Complex ang Arena Dance Competition bangud indi na ini safe sa tanan.
Natalana nga i-announce sang foundation ang venue sang arena dance sa una nga semana sang Setyembre kadungan sang ila nga launching.
[sibwp_form id=1]