Reformulated kag manubo lang ang dosage sang Covid-19 vaccine nga ginabakuna sa mga 5-11 year old.
Gani wala man sang na-record nga adverse effect following injection sa may 539 ka mga magagmay nga kabataan nga nagpabakuna sa pagbukas sang pediatric vaccination program sa tatlo ka mga ospital sa Bacolod kahapon.
Suno kay Dr.Chris Sorongon, deputy for medical data and analysis sang Bacolod Emergency Operations Center, ila na gin abisuhan ang mga ginikanan kun may magtuhaw gid man nga epekto sang bakuna sa mga kabataan.
Nalakip sa common symptoms sa mga nabakunahan ang paghiilanat, pagpalang-alay sang butkon kag abaga kun diin ginpadapat ang bakuna.
Posible man suno sa doktor ang pagtuhaw sang allergic reaction gani importante man ang pagpakunsolta kun ginakinahanglan.
May masobra sa isa ka milyon nga 5-11 year old ang target nga mabakunahan sang department of health sa Western Visayas, masobra sa otsentay uno mil diri ang sa Bacolod.