Shadow

Bacolod EOC nagahinyo sang dugang nga manpower kag equipment sa tunga sang pagsaka sang Covid-19 cases

Bangud sang nagasaka nga demand sang supply sang oxygen sa mga ospital, katunga na lang sang ila gina-order nga supply sang oxygen halin sa ila supplier ang nagalab-ot sa dealer sang medical and industrial gas suppy diri sa may dalan Burgos sa Bacolod.

Suno kay Jan Rey Flores, supervisor sang baligyaan, masami wala sila sang may mahimu ilabi na kun ang ila na mga customer ang mag-ayo nga bisan katunga na lamang sang supply sang medical oxygen ang ila itughong bangud kinahanglanon sang pasyente.

Wala man sang pagsaka sa presyo sang oxygen tanks kag bisan sa oxygen refill.

Ang isa ka 60 cyclinder tank nga may kabug-aton nga 50 pounds ang nagahamboy sa masobra otso mil pesos. Sais sinkwentos singkwenta pesos naman ang refilling fee.

Suno kay Dr. Chris Sorongon, deputy for medical data and analysis sang Emergency Operation Center, may mga on standby pa nga oxygen supply ang siudad. Pero naghinyo na sila sang bulig gikan sa Department of Health para sa dugang mga medical supplies kag medical personnel bangud yara naman sa kritikal ang utilization capacity rate sang mga hospital sa Bacolod.

May apat na ka mga ospital ang temporaryo nga indi makabayon sang Covid kag non-Covid patients bangud puno na.

Nalakip diri ang Corazon Locsin Montelibano Memorial Regional Hospital, Riverside Medical Center, Bacolod Adventist Medical Center kag South Bacolod General Hospital.

Ginsiling ni Sorongon nga ang pagsaka sang utilization rate sang mga ospital ang tuga man sang pagsaka sang Covid-19 cases nga posible tuga sang Delta variant.

Sumugod sang bulan sang Setyembre naglab-ot naman sa kwarentay siete ang Covid-19 related deaths sa siudad.

Ang early detection, prevention kag cure pati na ang pagpabakuna sa mga vaccination centers ang hugot nga ginapanawagan karon sang eoc agud mapaiway ang pagkautas sang kabuhi tuga sang virus.

Ginahinyo nila ang pumuluyo nga ipabilin ang ecq mindset sa tagsa-tagsa agud nga mapunggan ang paglapta sang Covid-19.

Leave a Reply

Your email address will not be published. Required fields are marked *

Secured By miniOrangeSecured By miniOrange