Halos indi man maglayo ang mga peke nga vaccination card kag bisan ang mga certificate sa original nga mga documents nga gina-issue sang City Health Office nga narecover sang kapulisan kag Emergency Operations Center sa entrapment operation batuk sa tatlo ka mga persona sa Barangay 24.
Gani luyag man ni Em Ang, executive director sang EOC, nga mapadalman pa sang kapulisan ang pagpangusisa agud mapat-ud kun sino pa ang mahimu nagahimbun sa ila para sa pagpeke sang mga dokumento nga ila ginabaligya sa publiko.
Dugang pa ni Ang nga magluwas nga delikado ang ini nga iligal nga hilikuton sarang man mabutang sa peligro ang ikaayong lawas sang publiko nga mahimu makasalamuha sang mga nagagamit sang peke nga vax card kag certificates.
Panawagan sang EOC sa publiko nga sa baylo mag-gasto sa peke nga vax cards, sarang makapabakuna ang mga wala pa nabakunahan sa mga vaccination center sang siudad agud matagaan sila sang mga pribilihiyo kun fully vaccinated na.