Opisyal nga nagpungko si Colonel Eugene Rebadomia bilang bag-o nga officer-in-charge sang Bacolod City Police Office sa ginpatigayon nga Turnover of Command kahapon sa BCPO headquarters sa Bacolod City.
Ginbuslan ni Rebadomia si outgoing city director Col. Joeresty Coronica matapos ang iya isa ka tuig kag anum ka bulan nga tenure bilang pamuno sang BCPO.
Nagpasalamat si Coronica sa tanan nga personnel sang BCPO sa ila pagsuporta kag dedikasyon, kag sa tanan nga nagsalig kag naghatag sa iya sang oportunidad nga makaserbisyo bilang police city director sang Bacolod.
Ginbaton ni Rebadomia ang hangkat ni Bacolod Mayor Greg Gasataya nga padayunon kag pabaskugon ang kampanya batok sa iligal nga droga, nga suno sa alkalde, amo ang masami ginahalinan sang kriminalidad.
Suno kay Gasataya, taga Barangay Mansilingan si Rebadomia kag isa siya sa lima nga nalakip sa shortlist sang magabulos kay Coronica.
Si Rebadomia ang nagserbe sa Regional Operations Division sang sa Police Regional Office-Negros Island Region.
Samtang, si Coronica ang gin-transfer headquarters sang PRO-NIR para sa iya career enhancement.
Ginpangunahan ni Police Brigadier General Arnold Thomas Ibay, regional director sang PRO-NIR ang turnover of command ceremony.*
[sibwp_form id=1]