Siudad sang Bacolod ang nagsumite na sang vaccination plan sa Department of Health bilang isa sa mga requirements antes makabaton sang COVID-19 vaccine.
Ginpahayag sang executive director sang Bacolod Emergency Operations Center nga si Em Ang nga nabaton na sang DOH ang amo nga vaccination plan nga nagalakip sang mga pagpanghanda nga nahimo na sang siudad angut sa pagtransport, pagbaton, storage kag pagdapat sang bakuna sa mga pumuluyo.
Kabahin man diri ang monitoring sang mga pumuluyo matapos sila nga madapatan sang bakuna.
Sang nagligad nga Biernes, isa ka dry run ang ginpatigayon sang siudad para sa pagahimuon nga COVID-19 vaccination sa barangay.
Kun maapbruhan na sang DOH ang vaccination plan, magahulat na lamang ang Bacolod para sa pag abot sa gin order sini nga bakuna sa AstraZeneca Pharmaceutical Philippines.
Damlag pa, ginpahayag ni Bacolod Mayor Evelio Leonardia nga isa ang Bacolod City sa mga local government unit nga hatagan sang national government sang prayoridad sa pagahatagan sang bakuna.