Masobra na sa 356,000 ka indibidwal ukon 86.76 percent ang nabakunahan sa masobra 410,000 nga target mabakunahan sang local government unit sang Bacolod.
68.93 percent naman ang fully vaccinated ukon malapit na sa 70 percent herd immunity ang Bacolod sandig man sa record sang Bacolod Emergency Operations Center.
Bisan pa ginakalipay man ini sang EOC, padayon gihapon ang ila paandam sa publiko ilabi na sa kahangawa sang Omicron variant.
Tungod man sang ginapaabot nga mga pagtipon-tipon sa paskwa ginapangabay ni Em Ang, executive director sang EOC nga kuntani outdoor ang party kag fully vaccinated ang mga ma attend.
Hugot man nga ginabantayan sang siudad ang mga nagapinauli nga pasahero sa seaport kag sa Bacolod-Silay Airport agud mapasiguro nga ang naga inabot nga pasahero nga halin sa pungsod nga yara sa red list ukon mga lugar nga may mataas nga kaso sang Covid-19 ang naglabay sa eksakto nga proseso sang pagpauli kasubong sang pagpa quarantine sa Manila kag pagpaidalom sa RT-PCR test.