Patay ang 25 anyos nga babaye matapos nga ginlabo sang kaugalingon sini nga amay sa Purok Kawayanan, Brgy. Rafaela Barera, siudad sang Sagay Miyerkules sang hapon.
Ang biktima ginkilala kay Roselyn Sulan, samtang ang suspek ginkilala sa kay Richard Sulan, 52-anyos.
Suno sa kay Police Lieutenant Hanna Banquil ang Deputy Chief of Police sang Sagay City PNP, naka inum ang suspek kag gina-alegar ini ang ginkadtuan sang biktima kag may dala nga espading.
Dugang pa sang pulis, gilayon nga nagluntad ang pagbinaisay sa tunga sang mag-amay tubtub nga gina-alegar nagpulot sang bato ang biktima kag ginhaboy sini ang iya nga amay.
Gintambagan pa sang iya nga utod ang biktima apang wala ini nagpapugong, nagkuha sang espading ang iya nga amay kag nag resulta sa paglabo sa biktima.
Nakaagum sang madamo nga pilas ang biktima sa nagkalain-lain sini nga bahin sang lawas kag nautod pa ang nawala nga kamot sini, ginhingagaw pa ini dala sa ospital apang gindeklarar nga dead on arrival.
Gilayon man nga nagsungka ang amay sa kapulisan matapos ang insidente kag ini ang pasakaan sang kaso nga parricide.
Nagagwa sa imbestigasyon sang kapulisan nga madugay na ang mag-amay nga may kaakig sa isa kag isa.