Arestado ang mag live-in partner sa buy-bust operation kagab-i sa Barangay Mambulac siudad sang Silay.
Ang subject sang buy-bust amo si Ma. Chin-Chin Grace Cuadra, 27 anyos kag upod nadakop ang iya live-in partner nga si Jeffrey Fuentes.
P353,000 pesos nga balor sang iligal nga droga ang nakuha sa ila lakip na isa ka armas.
Gina usisa karon sang Silay PNP kun si Chin-chin Cuadra, amo ang gina tumod nga isa sa persona nga nalakip ang pangalan sa papel, upod sa nasapwan nga utod nga kamot sang tawo sa galunan sang ice cream sa Barangay 2 sa Bacolod sang nagligad nga semana.
Suno kay NOCPPO spokesperson, Lt Judesses Catalogo, ang nadakpan nga suspek ang nagsiling nga indi siya ang gina tumod pero ini ang gina usisa sa gihapon sang kapulisan.
Si Cuadra ang suno kay Catalogo, taga Bacolod kag yara lang ini sa Silay City kun sa diin naga puyo ang iya partner.
Pahayag naman ni Police Station 2 commander, Captain Jonito Pastrana nga dako nga posibilidad nga si Cuadra amo ang gina tumod sa listahan.
Isa abi si Chinchin sa duha ka nabilin nga persona nga nasulat sa papel nga wala nila ma estorya bangud wala na ini sa Bacolod.
Siya ang suno kay Pastrana himata man sang mga convicted nga Cuadra sa Bacolod.
Detained karon si Cuadra lakip na ang iya live-in partner sa Silay PNP.