Miyerkules nag file sang iya nga Certificate of Candidacy para sa pagka alkalde sang Talisay City si Atty Rowena Lizares.
Si Lizares nga isa ka abogada, negosyante kag community service advocate ang nag tal-os sa iya nga bana nga si Mayor Neil Lizares nga yara karon sa iya nga third and final term. Upod ni Lizares nga nag-file sang ila nga COC ang iya partymates sa idalom sang Partido Kusog Talisaynon.
Runningmate ni Atty Lizares amo si Vice Mayor Jose Nicolas Jalandoni, III.
Suno kay Lizares ang iya nga pagpapili indi lamang para mapadayon ang legacy sang subong nga administrasyon kundi nagalakip man sang pag pundar pa gid sa foundation nga naplastar na, kasubong man ang pagadal-on niya nga vision kag mga bag-o nga perspective.
Sa banwa naman sang Murcia, Martes sang nag-file snag ila nga COC si Mayor Gerry Rojas kag Vice Mayor Johnny Reosura upod ang walo nila ka mga kandidato sa Sangguniang Bayan.
Sa isa ka pahayag ginsiling ni Rojas nga luyag niya matapos ang tatlo niya ka termino agudto matapos niya ang tanan niya nga mga ginhandom para sa banwa.
Sa banwa sang Ilog, tigayon naman naka file sang ila nga COC si Mayor John Paul Alvarez, Vice Mayor niya ang iya anak nga si John Paulo Alvarez upod ang ila nga walo ka mga konsehal.
Nalakip sa ila na slate sa konseho si anay Bacolod Police City Director Celestino Guara, Jr. Sila ang nag-file sa idalom sang Nationalist People’s Coalition.
As of press time sa record sang COMELEC 13 na ang nag-file sang COC para sa mayoralty post.