Padayon ang pagpanghanda sang Department of Education sa natalana nga pagbukas sang klase sa Agosto.
Pagkaayo sang mga eskwelehan nga na igo sang Bagyo Odette kasubong man kampanya sa pagpabakuna sang mga kabataan ang gina tutukan.
Suno kay DepEd – Negros Occidental Division Schools Superintendent Marsette Sabbaluca, 48 porsiento sa mga eskwelahan nila ang handa sa pagbukas sang klase sa Agosto 22.
Sa July 12 nila nga datus 252 sa 581 ka mga public school kag 10 sa 117 ka private schools ang handa. Pero, ang mga eskwelahan sa EB Magalona, Don Salvador Benedicto, Pontevedra, Toboso kag Valladolid ang 100 percent na nga handa suno kay Sabbaluca.
Paathag niya may mga eskwelahan nag nag kalaguba sang mag igo ang bagyo Odette sang Disyembre kag ini sa karon ang gina pangitaan sang pondo para makaayo. Naga bulig ang gobyerno probinsyal kag may 30 milyones pesos na nga napain gikan sa Provincial School Board pero ini ang kulang pa.
Suno kay Sabbaluca may naga kaigo pa man nga tion kag ini ang mangin handa sandig sa School Safety Assessment Tool, sa pagbukas sang klase.
“Sa subong ang amon gid ya ready nga schools mga ano pa lang kita, 48 percent. So target pa na siya namon. May ara pa kita time until mag open ang classes naton by August and until November”, suno kay Sabbaluca.
Nobyembre 2 ginapaabot ang full face-to-face classes kag humalin Agosto 22 tubtob Oktubre 31 ang maga serbe nga transition period. Suno kay Sabbaluca labing gina haylo nila ang mga ginikanan nga mag pabakuna sang ila nga kabataan bilang kabahin sang pag pangapin kontra Covid – 19.
“Ang aton nga School Assessment Tool naka butang nga ang mga students ta pwede ang mga unvaccinated magkadto sa aton nga eskwelahan for onsite nga learning but gina encourage ta gid ang mga parents naton nga mag pabakuna gid ang aton kabataan kay additional safety na siya sa iya and of course sa mga classmates man niya”, suno kay Sabbaluca.
Samtang, sa datus sang DepEd Region 6, may 1,356 ka mga eskwelahan ang nag patuman sang limited in-person classes para sa 2021-2022 nga school year. Suno kay Hernani Escullar ang spokesperson sang DepEd Region 6, may 5,068 ka mga eskwelahan sa Western Visayas kag padayon ang pagpatuman sang validation.
Labing ginatinguhaan sang DepEd suno sa iya nga maka comply sa mga rekisitos sandig sa ginpa gwa nga DepEd order.