Mabatian sa sini nga video ang paglinupok kag makita ang pagpaninguha sang mga pumuluyo lakip na ang mga kabataan sa pagpanago sa sulod sang ila balay, samtang nagapadayon ang engkwentro sa Barangay Tamlang, Escalante City, mga pasado las dos sang hapon sadtong Lunes, Hunyo 1.
Isa ka soldado sang 79th Infantry Battalion ang napatay sa natabo nga engkwentro.
Naglawig sang 10 minutos ang pagbayluhanay sang lupok sang mga soldado kag lima ka mga katapo sang New People’s Army Northern Negros Front.
Suno kay 1st Lt. Fevie Fajardo, ang civil-military operations officer sang 79th IB, ang mga naka-engkwentro sang mga soldado amo ang mga rebelde nga responsable sa pagpatay sang duha ka mga sibilyan sa Calatrava sang Mayo 5 kag 14.
Samtang, isa naman ka gin-alegar miyembro sang NPA ang nadakop kag nakuhaan sang .45 caliber pistol sa checkpoint operation sang Armed Forces of the Philippines kag Philippine National Police sa Barangay Mabini, Escalante City, mga las 4 sang hapon sadtong Lunes.
Suno kay Fajardo, gikan ang amo nga persona sa Barangay Tamlang.*
[sibwp_form id=1]