Ginpahayag ni Major Cenon Pancito, Chief sang Public Affairs Office sang 3rd Infantry Division sang Philippine Army nga may mga nakalab-ot gid man sa army nga report angut sa mga naga pakilala nga katapo sang MNLF ukon Moro National Liberation Front sa banwa sang Murcia kag Don Salvador Benedicto.
Pero si Pancito nag siling nga wala sang presensya sang MNLF sa Negros kag ang mga nagapakilala ang mga miyembro lang sang sindikato ukon budol-budol.
Suno kay Pancito, may kaangay man nga mga modus nga gin report sa isla sang Panay kag ang ila ginahimo amo ang magpangilkil sang kwarta sa mga pumuluyo.
Suno kay Pancito, ila gina ganyat ang mga pumuluyo nga mangin miyembro sang MNLF agud makabaton sang P50,000 nga sweldo gikan sa gobyerno.
Pero antes maka sulod, sila ang naga pangayo sang masobra P1,000 nga registration fee kag kapin P400 nga balayran sa ID.
Matapos sini suno sa army, gina palagyo na sang grupo ang kwarta.
Posible suno kay Pancito nga ang ini nga grupo nga naga operate sa Panay ang nag saylo lang sa Negros kag pareho nga modus ang ila gina himo.
Sila ang naga paandam man sa mga pumuluyo nga indi mag pati ukon magpadala dala sa grupo.