Ginsiling ni Ai-ai Gamboa, Vicce-president sang Community Animal Rescue Efforts ukon CARE, nasaksihan kag gintinguhaan pa sang mga estudyante sang unibersidad nga punggan ang paghan-os sang baston sang security guard sa ido ugaling wala ini nag-untat asta nga wala na naga-giho ang layaw nga ido.
Padayon pa nga gina-usisa sang animal welfare group ang insidente agud nga mapasakaan sang kaso angut sa animal cruelty ang gwardiya.
Suno kay Rhoderick Samonte, Director for Internationalization and External Relations sang Carlos Hilado Memorial State University, wala nila gina-tolerate ang ano man nga sahi sang pagpanakit sa hinuptanan ilabi na sa eskwelahan amo nga padayon nila nga gina usisa ang insidente kag natalana sila nga maghatag sang pahayag sa natabo.
Nangabay man ang pamunuan sa publiko nga ipaiway anay ang pag-judge sa security guard nga ginatudlo responsable sa natabo nga insidente.
Nasugilanon naman sang CARE upod sa grupo nga INsPyred ang gwardiya nga nagsiling ginpangapinan niya lamang ang kaugalingon sang gintuyo siya nga atakehon sang ido nga nag sulod sa campus.