Ang gina lauman nga maga gikan sa Negros ang maga pamuno sa Sugar Regulatory Administration ang natuman matapos nga gin-appoint bilang acting administrator si David Alba.
Gin appoint ni Presidente Ferdinand Marcos, Jr., si Alba kag kanday Pablo Luis Azcona bilang planters’ representative kag Ma. Mitzi Mangwag bilang Millers’ Representative sa sugar board sandig sa kumpirmasyon ni Executive Sec Victor Rodriguez sang Sabado.
Sanday Alba kag Azcona ang gikan sa Negros Occdental. Si Alba ang general manager sang Asociacion de Agricultores de La Carlota y Pontevedra Inc kag sang La Carlota Multi-Purpose Cooperative. Si Azcona naman Unifed Director.
Suno kay Lacson maayo nga na re-organize na ang SRA agudto matutukan man gilayon ang mga issue nga gina atubang karon sang sugar industry.
Samtang, kun may nagakaigo man lang nga ebidensya, pabor man si Lacson sa gina duso pag usisa sa mga warehouse sa probinsya sa pag pasiguro nga wala sang may nagakatabo nga hoarding. Ang kaso sa Luzon suno kay Lacson kaso sang gina alegar smuggled sugar.
Suno sa gobernador, sa bisan ano nga commodity tuman ang epekto sang smuggling. Dapat suno sa iya ang mga bodega nga imbolbado diri ang ma buksan kag ma kumpiskar ang mga smuggled commodities.