Mag-utod nga suspek sa pagpatay sa isa ka lalaki sa Brgy. 22, Bacolod City, nadakpan kag nakuhaan sang mga pusil.
Nadakpan sang kapulisan ang mag-utod nga suspek nga nagtiro kag nagpatay sa 54-anyos nga lalaki sa atubang sang isa ka store sa corner Hilado-Rizal streets sa Barangay 22, Bacolod City, Biyernes sang gab-i.
Naga-inom sa tiyange sa idalum sang barangay hall si alyas “Ruben”, residente sang Brgy. 23 upod ang isa ka tanod sang nag-abot ang duha ka suspek, sakay sang motor.
Gintiro sang mga suspek ang biktima gamit ang KG9 submachine gun nga gintago sa sako kag nalagyo. Wala masalabat ang tanod.
Sa follow-up operation, nadakpan ang duha ka suspek nga sanday alyas “Junjun Paloy” kag ang iya manghod nga si alyas “Jerme”.
Narekober sa boarding house nga ginatineran sang mga suspek sa Purok Avocado, Barangay 20, ang duha ka mga armas, mga bala kag motor.
Ginsiling ni Police Captain Efren Legada, hepe sang Station 1, ginpaidalum sa crossmatching kag ballistics test ang narekober nga mga armas.
Suno kay Legada, isa sa mga motibo nga ila ginalantaw amo ang daan nga inaway. Dugang pa, nakapa-blotter ang biktima sa Station 4 nga nakabaton siya sang pagpamahog halin sa mga suspek.
Ang biktima, naga-obra bilang driver kag caretaker sang property.
Kaso nga murder kag pagsupak sa Republic Act 10591 ukon Comprehensive Firearms and Ammunition Regulation Act ang ipasaka batok sa mga suspek.*
[sibwp_form id=1]