Anay Presidente Rodrigo Duterte gin paandaman si Presidente Ferdinand Bongbong Marcos nga indi pagligwaton ang konstitusyon para makapadalagan liwat. Ini sa ginpatigayon nga prayer rally sa Dumaguete City sang kagab-i.
Makapila ka beses nagpabutyag sang langot sang buot ang anay presidente bangud ginbawi ang permit nga gin hatag sa ila sang lokal nga panguluhan sang Dumaguete City. Paathag sang LGU, lain nga tawo ang una nga nag process sang permit kag sang ulihi indi na siya kabahin sang grupo nga naga organize sang rally. Lain na naman nga mga tawo ang nag lisensya kag sang Sabado lang gani subol na sa oras kag kulang ang pwersa sang PNP para magbantay sa anay presidente. Sa pihak sini nadayon sa gihapon ang pag tipon-tipon. Sa kilid sang dalan nag press conference si Duterte kag sa may Quezon Park naman ginpatigayon ang programa.
Makapila man ka beses nga ginliwat-liwat sang anay presidente nga sa Freedom Park dapat gina pahanugotan ang mga pumuluyo nga maka pautwas sang ila balatyagon.
Ginpaandaman ni Duterte si Marcos, Jr., nga indi pagligawton ang konstitusyon para lang maka papili liwat bilang presidente. Dugang pa niya, ang tawo ang naga panawagan sa iya anak nga si Vice President Sara Duterte nga magpapili bilang presidente. Kag kun ini ang mangin mapalaron, indi naman siya maka extend sang iya termino.
Ini ang nangin kaundan sang prayer rally nga gin organize sang Duterte supporters.