Dakup ang anay kagawad kag live-in partner sini matapos gin-alegar mabaklan sang ginasuspetsuhan shabu sa Rizal Street, Barangay II-Poblacion sa banwa sang Pontevedra, Negros Occidental, kahapon, Miyerkules.
Ginkilala ang mga gin-aresto nga sanday alyas “Chris”, 50-anyos, residente sang Barangay 5 sa Kabankalan City, kag alyas “Rufa”, 36-anyos, residente sang Barangay Enclaro sa Binalbagan.
Ginsiling ni Police Captain Darryl Kuhutan, hepe sang Pontevedra PNP, naga-renta sang apartment ang duha sa Pontevedra kag na-monitor sang kapulisan nga nagapakigbahin sila sa pagbaligya sang iligal nga droga.
Nakuha sang katapo sang Pontevedra Police Station gikan sa duha ang 15 ka pakete sang ginasuspetsuhan shabu nga nagabug-at sang 120 ka gramos kag may market value nga P816,000.
Magluwas sa iligal nga droga, nakuha man sa ila ang isa ka glass tooter nga may traces sang suspected shabu, mga empty transparent plastic sachets nga ginagamit sa pag-repack, black straw scoop, lighters kag surgical scissors.
Suno sa hepe, naka-agi na dakup ang mag-live in sa kaso may angut iligal nga droga, apang nakagwa matapos mag-avail sang plea bargaining agreement.