Ginakabig kadalag-an sang Power Watch Negros para sa mga konsumedor ang 30-day suspension order sang National Electrification Administration batuk sa anay general manager kag anum pa ka mga board directors sang Central Negros Electric Cooperative ukon Ceneco.
Ang consumer watch group ang nagpasaka sang kaso nga Grave misconduct, Gross Neglect Dishonesty, Gross Insubordination, Conduct Prejudicial to the Interest of the EC kag MCO. Ini may kaangtanan sa 20 megawatt contract extension sang Kepco SPC Power Corporation nga nagtakop sang Mayo 2022.
Sa decision sang NEA Administrative committee sanday Board of Director Jojit Yap, anay board of director Robert Javellana, Ernie Larida, Martha Joyce Cuenca,Antonio Panique kag Eugene Velasco amo man si anay acting general manager Atty. Danny Pondevilla ang guilty of simple neglect of duty kag ginpinahan sang 30 days suspension.
Wala pa mabaton sang mga board of directors ang kopya sang decision sang NEA.
Bwas natalana magahatag sang ila opisyal nga pahayag sanday Yap kag katapo sang Ceneco Board.
Ginapasalig naman sang tagdumalahan sang Ceneco nga indi maapektuhan ang ila pagserbisyo sa mga member consumers.
Ang Ceneco project supervisor kag Department Manager sang Human Resources amo ang ginmanduan nga magpatuman sang desisyon.