Gin-ako sang Leonardo Panaligan Command sang New People’s Army, Central Negros Guerrilla Front ang pagpatay sa anay barangay tanod nga miyembro man sang Barangay Elite Rescue Team sa Sitio Nabuluan, Barangay Binalbagan sa Canlaon City, Negros Oriental.
Suno sa NPA, intel sang Army si alyas “Ryan.”
Nag-gwa sa imbestigasyon sang Canlaon PNP nga papauli na kuntani sa ila balay ang 30-anyos nga biktima sakay sang motorsiklo sang siya ang gintiro sang duha ka mga suspek.
Suno sa pulis, ginkuha sang mga suspek ang sling bag sang biktima nga may unod nga cellphones kag wallet, antis sila ang nalagyo sa wala mahibaluan nga direksyon.
Gindeklarar nga dead on arrival ang biktima sa Canlaon City District Hospital.
Tinalikdan nga semana, isa ka anay miyembro sang Civilian Armed Forces Geographical Unit ukon CAFGU ang ginluthang man sa sulod sag iya balay sa Sitio Banban, Barangay Bucalan.
Ginakabig sang Army kag kapulisan ang barangay Bucalan kag Binalbagan bilang internal security operations zone bangud sang presensya sang NPA.
Ginpabaskog na sang Army ang ila anti-insurgency operations sa Canlaon matapos ang duha ka pagpamatay nga gin-ako sang mga NPA.