Grupo nga Amlig Kuryente nagapanawagan nga kun indi man lang magpa-rehistro sa Cooperative Development Authority ang CENECO mas maayo pa nga ibaligya na lamang ini sa mga interesado sa baylo nga iduso ang joint venture agreement.
Malawig na nga ginahinyo sang Power Watch group nga Amlig Kuryente ang pagparehistro sang Central Negros Electric Cooperative sa Cooperative Development Authority sa pagpati mas nagakaangay ini nga himuon agud ma-amligan ang power utility pati na ang mga empleyado.
Suno kay anay councilor Wilson Gamboa, Jr., nga convenor sang grupo, kun indi man lang ipa-rehistro sang management ang CENECO sa CDA antes sang ginaplano nga joint venture agreement upod sa MORE Electric and Power Corporation kag MERALCO mas nagakaangay nga ibaligya na lang ini sang diretso sa mga interesado nga private firm.
Nagapati si Gamboa nga done deal na ang JVA gani ginakahangaw-an niya nga mahimo mangin disbentaha lamang ini sa mga kunsomedor kasubong sang nagakatabo karon sa BACIWA.
Ang tagdumalahan sang CENECO upod sa Board of Directors ang nagahulat na lamang sang guidance halin sa National Electrification Administration angut sa proposed joint venture agreement.