Ginrespondehan sang rescue team sang Moises Padilla Disaster Risk Reduction and Management Office ang isa ka lalaki sa Sitio Can-amo, Barangay 6 Poblacion sa Moises Padilla matapos nga nagpin-ot ang iya dughan kag nabudlayan sa pag-ginhawa.
Ginpahayag sang mga himata nga nagkaon sang snake-necked turtle ang lalaki nga ginkilala kay alyas “Daku”, 47-anyos, upod man ang iban pa nga mga persona.
Apang si alyas “Daku” lang ang naglain ang pamatyag.
Ginhatagan sang supplemental Oxygen ang lalaki kag gindala sa Municipal Health Infirmary apang siya ang gulpi lang nadulaan sang pulso.
Gintinguhaan sang mga responder kag staff sang infirmary nga salbaron ang kabuhi sang lalaki apang siya ang nagtaliwan.
Masami nga makit-an ang snake-necked turtle ukon isa ka sahi sang ba-o sa mga tab-ang nga tubig. Ang mga ginakaon sini amo ang magagmay nga mga isda, insekto, lago, ulong-ulog, paka, kag iban pa.*
[sibwp_form id=1]