Upod sang 29-anyos nga amay ang tatlo sini ka mga kabataan sang nag-abot ang lima ka mga armado nga lalaki sa ila puloy-an sa nabukid nga bahin sang Sitio Gut-ac, Purok 4 sa Barangay Abaca, banwa sang Cauayan, mga las 7:30 sang gab-i, Miyerkules, Hulyo 8.
Gintawag sang mga suspek ang biktima nga mag-gwa sa ila balay. Kag didto na gintiro sang isa sa mga suspek ang biktima sang makapila ka beses, gamit ang long firearm, rason sang iya kamatayon.
Isa ka mangunguma ang biktima kag nagaisahanon niya nga ginasagod ang tatlo sini ka mga kabataan matapos sila ang ginbayaan sang iya asawa.
Ginsiling ni Lt. Col. Norberto Barniso, hepe sang Cauayan PNP, may inisyal nga lima ka igo sang bala ang nakit-an sa lawas sang biktima.
Narekober sa crime scene ang pito ka fired cartridge cases sang caliber 5.56mm.
“Gina-imbestigahan pa namon kung ano gid ang motibo kung ngaa amo gid ni ya ang pagpatay sa iya. So under investigation pa as to the motive. Bali ang naga-upod na lang da common sa ila balay ang iya nga nanay. Sang natabo to, ang nanay niya wala da kay may ginkadtuan siguro, bale sila lang nga kabataan niya ang nabilin,” suno kay Lt. Col. Barniso.*
[sibwp_form id=1]