Ginkumpirmar ni City Legal Office Karol Joseph Chiu nga tigayon na nga naka renew sang business permit ang AMA Computer College Bacolod Campus sang Huwebes nga adlaw.
Serbehan na kuntani sang closure order sang CLO ang pribado nga eskwelahan, apang nagdungan man sa amo nga adlaw ang pagwa sang ila nga business permit.
Ginklaro sang CLO sa tiglawas sang eskwelahan nga wala nila ginapabudlayan ang pagkuha sang permit apang ginahaylo lamang sang siudad ang mga negosyante nga mangin compliant sa layi.
Nangin kontrobersyal ang AMA Computer College matapos nga nagreklamo ang masobra 150 ka mga senior high school students bangud wala sila gintugutan nga magpakigbahin sa ila graduation rites bangud sa gina-alegar kakulangan sa balayran kag dokumento.
Matapos nga nagdangat sa igtalupangud sang mga opsiyal ang amo nga isyu, ginhatagan sang eskwelahan sang isa ka special graduation rites ang mga nasambit nga estudyante sang Hulyo 22.
Samtang, may 19 pagid ka mga establishemiento nga ginsirad-an sang CLO ang tigayon naman nga nakaproseso sang ila mga kulang nga dokumento, rason nga nagbukas na liwat ang mga ini.
Lakip sa 19 nga nagbukas na ang isa ka kilala nga resto bar sa Bacolod.
Padayon man suno kay Chiu ang ila operasyon kag handa sila sa gihapon nga mag serve sang closure order sa mga baligyaan nga wala permit, sandig sa rekomendasyon sang Business Permits and Licensing Office.
[sibwp_form id=1]