Biyernes sa ginpatawag nga meeting para sa mga katapo sang Grupo Progreso, personal nga ginpahibalo ni Mayor Evelio Leonardia si Councilor Al Victor Espino nga nadulaan na ini sang salig sa iya bangud Sang pagka mayuhay nila ni Albee Benitez nga iya mangin kasumpong sa mayoralty race sa bacolod sa 2022.
Ini ang ginpahayag ni Espino sa pag atubang sa media sang kahapon matapos magwa ang balita nga indi na siya kabahin sang Grupo Progreso. Paathag niya, malapit gid man siya kay Benitez halin pa sang una kay iya ini nga mentor pero nangin loyal siya nga katapo sang Grupo Progreso.
Present ang tanan nga katapo sang GP sa amo nga meeting magluwas na lang kay Congressman Greg Gasataya nga gin updan si House Speaker Lord Allan Velasco nga ara sa Bacolod kag si Atty. Cesar Distrito naman nga naga hatag sang exams sa iya nga klase sang amo nga ti-on.
Suno kay Espino halos kada semana na sila gina loyalty check sa partido kag gina pamangkot kun bala sa kay Leonardia sila sa gihapon. May mga naga pamangkot man gani kuno sa iya kun bala san-o siya masaylo sa kampo ni Benitez pero suno kay Espino wala man siya nag biya sa kay Benitez humalin sang una kay mag abyan sila bisan pa katapo siya sang Grupo Progreso.
Sa statement naman nga gin release sang kampo ni Leonardia kag sang Grupo Progreso, ginpaathag sang akalde nga ang meeting nga ginpatawag ang para sa pag finalize sang partido satmtang naga hilapit ang filing sang Certificate Of Candidacy sa Oktubre.
Ang tanan nga kapartido ang gintgaan sang chansa maka hambal kag natabuan nga si Espino ang pinaka ulihi nga ginpahambal kag naglawig ang diskusyon. May indi pag hangpanay suno sa kay Leonardia sa mga sensitibo nga bagay kag amo yadto ang nangin kabangdanan nga nagbiya sa meeting si Espino.
Pero paathag sang alkalde sa iya statement, boluntaryo ang pag biya ni Espino sa grupo kag wala siya ginpahalin. Nangin matwhay ang pagbiya ni Espino.
Para kay Espino, kun gina kwestyon na ang pagsalig sa isa ka relasyon mas maayo na lang nga magbiya.
Wala man siya sang may nabaton nga imbitasyon gikan sa kampo ni Benitez nga magsaylo sang partido. Siya man gani kuno ang nangita sang pamaagi nga naka sugilanon ang lideres sang Grupo Progreso kag si Benitez antes na pa man nag init ang lakat sang pulitika sa Bacolod.
Sa karon gina pakamaayo niya nga indi na lang anay magpadalagan para sa 2022 elections.
Pero kun ma imbitahan sa partido ni Benitez luyag niya anay pamatian ang plano sini para sa Bacolod antes siya mag desisyon.