99 ka mga hog raisers sa banwa sang EB Magalona nga nagkalamatyan sang baboy ang nagbaton sang assistance gikan sa gobyerno probinsyal.
Tig 2,000 pesos ang nabaton sang mga beneficiaries. 198,000 pesos sa kabilugan ang gin-release nga pondo sa pagpanguna ni Gov Eugenio Jose Lacson sang Miyerkules. Ini ang kabahin sang programa sang gobyerno probinsyal sa idalom sang DSWD nga mabuligan ang mga nagkalamatyan sang baboy bangud ayhan sang hog cholera ukon African Swine Fever.
May ika duha pa nga batch sang beneficiaries nga maga baton sang assistance. Suno sa pamuno sang Municipal Agriculture Office nga si Efren Garcia, Jr., sa banwa amat-amat na ang pagbalik sagod sang baboy sang mga hog raisers. Nanaog naman sa 320 pesos ang kilo sang baboy sa merkado sang banwa gikan sa 380 tubtob pa gani sa 420 pesos ang kilo sadto. Dugang pa ni Garcia nga gikan na sa lokal nga supply ang gina baligya nga karne sang baboy sa merkado. Upod na diri ang pahanumdom sa hog raisers nga mag halong kag bantayan sang maid-id ang sanitation sa pagsagod sang baboy.