97 ka mga informal settler families sa 6 ka mga barangay sa Bacolod nga apektado sa ginpatuman nga proyekto sang DPWH ang ginapangitaan na sang masayluhan.
Pebrero pa sang ginsuguran sang Department of Public Works and Highways ang revetment kag flood wall project sa Magsungay River sa Barangay Singcang-Airport kag Lupit River sa Taculing.
Ugaling wala napaiway ang delay sa proyekto bangud may pila ka mga pamalay nga yara sa kilid sang mga sapa.
May natalana man sila nga road concreting project kag iban pa nga proyekto sa Barangay Mansilingan, Barangay 2,3 kag 30 nga sarang maapektuhan ang mga informal settlers.
Sa public hearing nga ginpangunahan sang Committee on Urban Poor, Housing and Resettlement sang konseho, ginsiling sang tiglawas sang Bacolod Housing Authority nga kalabanan sa 97 ka mga apektado nga informal settlers sa anum ka barangay ang ginapangitaan na sang masayluhan nga relocation site.
May iban sa ila ang disqualified matapos man ang sa socio-economic survey sang BHA.
Ginhinyo naman ni Councilor Vladimir Gonzalez sa DPWH nga kun mahimu matigayon ang early coordination agud mapangitaan gilayon sang solusyon ang problema sa ISF kag mapaiway ang delay sa mga proyekto sang ahensya.