97 ka mga indibidwal nga nagpadulong sa mall para sa voters’ registration ang gin-reprimand. Pila diri ang na-isyuhan sang citation ticket bangud sang pagsupak sang minimum health protocol sa Bacolod.
Humalin sang ginsaylo ang voters’ registration sa Ayala Malls Capitol Central sang Lunes, nangin masako na ang ginahimu nga pagpanaway sang katapo sang Task Force Disiplina kaupod man sa katapo sang Bacolod City Police Office.
Ini bangud bisan sa kagab-ihon tubtob kaagahon madamo gihapon sa mga nagalinya sa mall nga mga voter applicants ang wala naga-suksok sang face shield kag nagatuman sa pagsulundan angut sa physical distancing.
Suno kay Wilfredo Geolingo, pamuno sang Task Force Disiplina, may napulo man ka persona ang gin-isyuhan sang citation ticket bangud sang paglapas sa curfew ordinance.
Pila sa ila ang gikan Silay, Escalante kag Bago City kag wala man sang mga dala nga ID.
Sa nubentay siete ka mga gin-reprimand halin sang Setyembre 21 tubtob 23, 15 ang naisyuhan sang violation ticket bangud wala nagasuksok sang face shield kag 6 ang nagsupak sa pagsulundan sa physical distancing.
Karon nga nagapadayon ang pagdagsa sang mga aplikante para sa Comelec voters’ registration hugot nga nagapaandam kag nagapahanumdom ang task force disiplina angut sa pagsunod sa minimum health protocol ilabi na nga nagasaka ang kaso sang Covid-19 sa Bacolod.