Patay ang 9 ka tuig nga bata nga babayi matapos ini mabungguan sang salakyan kag malapakan sang tricycle sang Sabado sang aga sa Dalan Rizal sa Barangay Lag-asan sa Bago City.
Sa imbestigasyon sang Bago PNP, nagadalagan ang salakyan sa dalan sang hinali mag tabok sa dalan ang biktima. Nagtinguha pa suno sa pulis nga mag likaw ang driver apang iya sa gihapon
nabungguan kag nag labog ang menor de edad sa pihak nga lane. Didto naman siya nalapakan sang nagadalagan man nga tricycle nga kargado sang mga sako sang feeds.
Gindala pa sa ospital ang biktima apang gindeklarar nga dead on arrival.
Samtang sa Talisay City naman, onse naman ka mga persona ang pilason matapos matumba ang ila nga ginasakyan nga multicab sa bahin sang Sitio Mambucano, Barangay Cabatangan sang kahapon.
Sa imbestigasyon sang Talisay PNP, gikan sa resort ang mga sakay sang multicab nga mga mag abayan kag mag himata sang hinali na lang mawad-an sang kontrol ang driver samtang nagadalagan sa dulhugon nga bahin sang dalan.
Didto na suno sa pulis natumba ang multicab nga may sakay pa nga tatlo ka tuig nga bata kag isa ka lapsag. Lunsay mga minor injuries man lang ang naangkun sang mga sakay sang salakyan suno sa pulis.