Padayon ang kampanya sang Philhealth para sa Yakap program sini. Gina haylo nila ang publiko nga mag avail sang mga libre nga serbisyo sa idalom sang programa para mapangapinan ang ikaayong lawas.
Suno sa Philhealth, sa 3.2 million nga projected population sang Negros Occidental, 9.04 percent pa lamang ang naka pa rehistro para sa Yakap ukon 293,506.
Sa mga banwa kag siudad sa Negros Occidental ang San Enrique ang may pinaka mataas nga Yakap registration 39.64% sa ila nga projected population ang naka pa rehistro.
Pero suno sa Philhealth, ila gina duso, indi lamang mag pa rehistro kundi dapat i-avail gid ang serbisyo.
Sa idalom sang Yakap program may yara sang Primary Care Benefit kaangay sang libre nga konsulta kag laboratory tests.
May cancer screening test benefit packages kag Philhealth Gamot – kun sa diin may 75 ka mga libre nga bulong nga sarang ma avail.
Bisan nga Philhealth member na, dapat gid nga mag pa rehistro sa gihapon para sa Yakap.
Sarang mag padulong sa talatapan mismo sang Philhealth, pwede man mismo sa portal sang Philhealth ukon sa egov app mag parehistro para mangin yakap member.
Indi lamang ang Philhealth member ang pwede maka pa rehistro kundi pati man ang mga dependents sini nga sarang maka avail sang kasubong man nga benepisyo.
Suno kay Janimhe Jalbuna ang head sang Public Affairs Unit, dapat mangin pro-active. Ang pag parehistro sa Yakap kasubong nga regalo na sa kaugalingon. Antes pa man mag masakit ukon mag lala ang masakit makig kita na sa mga duktor kag mag pa konsulta.
Ang Regional Vice President sang Philhealth nga si Marjorie Cabrieto naga haylo man sa mga clinics kag diagnostic facilities nga mag pa accredit sa Philhealth. Para man mas madamo pa gid ang sarang malambot sang libre nga serbisyo.
May 62 ka primary health care facilities para sa Yakap sa Negros Occidental, 45 ka Gamot pharmacies kag lima ka cancer screening facilities.
[sibwp_form id=1]