Nalakip ang Negros Oriental kag Negros Occidental sa listahan sang National ASF Prevention and Control Program nga may yara sang active ASF cases.
Pero, Negros Occidental nagklaro nga wala na sang active ASF case sa probinsya.
Sa September 24 nga report nga naka post sa page sang Bureau of Animal Industry, nalakip ang Bais City, Bindoy, Bayawan City, Tanjay City, Pamplona, Siaton, Valencia kag Zamboangita sa Negros Oriental sa may mga active ASF cases.
Sakop sa apektado ang 36 ka nagkalain-lain nga mga barangay.
Ang San Enrique kag Silay City sa Negros Occidental ang nalakip sa listahan. Pero suno kay San Enrique Mayor Jilson Tubillara duha ka bulan na sila nga wala sang active ASF case sa banwa.
Ini base sa resulta sang regular nila nga blood sampling.
“Wala na. Negative na kami subong. Two months ago. Una kami ayhan nag declare positive, so istrikto ang amon boundary control, plus gina monitor gid adlaw adlaw sang amon nga Department of Agriculture especially ang veterinary volunteers namon bala,” suno kay Tubillara.
Ginsiling man ni Silay City Mayor Joedith Gallego nga malawig naman ang tion nga wala sila sang active ASF case sa siudad.
“(wala na kamo active cases Mayor?) Wala na. Daw wala naman sila report subong,” suno kay Gallego.
Paathag ni Dr Placeda Lemana, provincial veterinarian, nga wala na sang active cases sa Negros Occidental pero nalakip ang duha ka LGU sa red zone bangud wala pa sila maka submit sang documents para ma upgrade na ang ila nga color zone.
[sibwp_form id=1]