Provincial Legal Office sa karon ang naga usisa sang gina alegar pagkadula sang masobra sa 700 ka bags sang fertilizer sa warehouse sa Bago City.
Suno kay Atty Alberto Nellas, Jr., nakabaton na sila sang incident report gikan sa Office of the Provincial Agriculturist kag Security Safety Division nga naga alegar sang pagkadula sang 789 ka bag sang fertilizer sa Rice Processing Center Warehouse sa Tabunan sa Bago City.
2.367 million pesos ang balor sang gina alegar nadula nga fertilizer nga gikan sa talatapan sang Department of Agriculture para sa distribution sa mga LGU.
Suno kay Nellas natukiban ang pagkadula sang maga withdraw ukon magakuha kuntani ang banwa sang Cauayan sadtong Oktubre ugaling wala na sang may nabilin sa warehouse. Sa report sang OPA suno kay Nellas wala man sang may nakit-an forcible entry.
Gani isa sa gina lantaw anggulo amo ang inside job. Padayon ang pag verify sang legal office sang report gikan sa OPA para sa mahimo rekomendasyon sa pagpapanaog sang show cause order sa mga personnel nga may kahilabtanan, depende sa ila nga employment status.
May lima ka mga ngalan nga nasaad sa incident report, suno kay Nellas, 2 diri gikan sa OPA kag 3 naman ang mga security personnel.
Ginpatuman na ang reshuffling suno kay Nellas.
Naka coordinate naman sa Bago PNP angut sa amo nga insidente.