Ini ang mga ido nga napabay-an sang mga tag-iya nga naga layaw sa mga dalanon…
Ginpang sikop sila sang City Veterinary Office kag gindala sa dog pound sang Bacolod.
Kun indi sila magawad sang ila nga mga tag-iya, ginapang patay sila.
Ang grupo nga Bach Project PH, isa ka non-profit organization nga naga pangapin sa mga kasapatan, ang indi maka tulon sa natalana nga kamatauyon sang sini nga mga ido.
Bangud sang iresponsable nga mga tag-iya, mapatay ang mga ido nga wala sang sala…
Suno sa kay Daniel Sam Salvatierra, isa sa mga representative sang grupo, ini ang nagduso sa ila nga mag organisa sang adoption drive nga event. Nagpanawagan sila sa publiko nga buligan nga ma rescue ang mga ido antes sila ipaidalom sa mercy killing.
Antes sini, masako na ang grupo sa pagpakaon sa mga ido sa city pound. gani sang mahibaluan nga natalana na nga i-mercy killing ang mga ido nagpangita sila sang pamaagi nga maluwas sila.
Sa mismo nga adlaw sang ila nga activity sadtong nobyembre katorse, ang pangabay nila nga tani man lang masalbar bisan 20 lang sa mga ido pero nakibot sila sang naubos nila tanan pa adopt ang stentay singko ka mga ido.
Dako ang pasalamat sang grupo nga pinaagi sa social media, nabatian ang ila nga panawagan. Ang iban sa mga nag adopt sang mga ido gikan pa sa gwa sang Bacolod. Kag ang nagkalain lain nga mga grupo nga naga rescue kag naga kampanya man para sa pag pangapin sa kasapatan ang nagbulig sa ila nga panawagan.
Sa karon wala na sang mag nabilin nga ido sa city pound sang Bacolod. Plano sang grupo nga mag pangita sang pamaagi nga ang mga ido nga masikop sang city pound ang indi na pagpatyon kundi mabutang sa isa ka pasilidad nga ma alagaan sila kag mapakaon.
Naga kampanya man sila para sa responsible pet ownership kay naga pati sila nga wala sang layaw nga ido kun wala sang pabaya nga tag-iya.