Patay ang isa ka 74 anyos nga lola matapos madanlog kag mahulog sa suba sa Hacienda JMA, Brgy. Payao banwa sang Binalbagan sang Miyerkules.
Suno sa kay Nelco Embultorio sang Research and Planning sa Binalbagan LDRRMO, papauli na kuntani ang senior citizen nga si Anita Balero, kag ini ang may dala nga bugas kag may sungkod.
Magatabok siya sa suba sang nadanlog kag nahulog sa suba kag nagresulta sa iya nga pagkalumos.
Natingala ang himata sang biktima nga wala na siya makapauli gani ila ginpangita.
Pasado las 2 sang hapon sang Huwebes, paagi sa ginpatigayon nga search and retrieval operation sang LDRRMO nakita ang bangkay ni Balero.
Pagkalumos ang gintunaan sang iya kamatayon.