Dead on arrival sa Rural Health Unit ang 72-anyos nga babaye matapos siya ang mabungguan sang EMS ambulance nga iya sang Barangay San Teodoro Binalbagan sa Hacienda Najalinan, Barangay Robles sa banwa sang La Castellana, Negros Occidental, kahapon.
Pareho nga padulong La Castellana proper ang ambulansya nga ginamaneho ni alyas “Ryan”, 47-anyos, taga Binalbagan, kag ang tricycle nga ginasakyan sang biktima nga si alyas “Maria,” residente sang Hacienda Malaga sa Brgy.Robles.
Nag-gwa sa imbestigasyon sang La Castellana PNP nga nagsakay sa tricycle halin sa Buena Park ang biktima kag sang yara na sa Hacienda Najalinan, nasugata niya ang iya bata nga naka-motor.
Ginpapundo sang babaye ang driver sang tricycle, ginpaypay sini ang iya bata, antes nanaug kag gulpi nagtabok sa dalan, rason nga nabungguan siya sang ambulansya.
Suno sa pulis, may inisyal na nga pag-istoryahanay ang magtimbang nga bahin.
Sa karon, nakagwa na sa prisohan ang driver sang ambulansya matapos mag-lapse ang iya 18 hours nga reglementary period of detention.
Ang ambulansya ang wala sang dala nga pasyente sang nagluntad ang insidente.*