Pilason ang pito ka mga sakada sang nagpalupok sang mga pusil ang blue guards sa Hacienda Escolastica, Barangay Mabini sa syudad sang Cadiz, Negros Occidental, Martes nga adlaw.
Ginsiling ni Police Lt. Col. John Joel Batusbatusan, hepe sang Cadiz PNP, away sa duta ang ginhalinan sang kinagamo.
Base sa imbestigasyon sang kapulisan, nagatapas sang tubo ang grupo sang mga Agrarian Reform Beneficiaries sang nag-abot sakay sa pick up truck ang gin-hire nga mga security guards sang tag-iya sang tubo.
Ginpa-untat sang mga blue guards ang mga sakada sa pagtapas sang tubo apang may nagluntad nga paglalisay.
Nag-gabot ang mga blue guards sang ila issued service firearms kag nagpalupok sang pila ka warning shots sa duta.
Apang, naigu-an sang mga bala sa lower parts sang ila nga lawas ang mga sakada.
Gindala ang mga pilason sa Cadiz City Emergency Clinic samtang detained sa custodial facility sang Cadiz PNP ang pito ka mga security guards.
Gin-turn over sang mga guards ang ila issued firearms sa kapulisan.
Suno sa hepe, subong nga adlaw pasakaan sang kaso nga frustrated homicide, paagi sa inquest proceeding, batuk sa pito ka mga security guards.