Silay City Mayor Joedith Gallego ang liwat nga naga pahanumdom sa mga empleyado sang Silay City Government nga likawan ang ano man nga kahilabtanan sa iligal nga droga.
Ini matapos may isa ka casual employee nga gin-report high value individual kag isa sa mga gindakop sa drug buy-bust operation nga ginpatigayon sang Silay City PNP sang Sabado sa Hacienda Adriana sa Brgy E. Lopez sa Silay City.
Subject sang buy-bust operation suno kay Lt Col Mark Darroca ang hepe sang Silay PNP ang isa ka 26 anyos nga gina kabig Street Level Individual nga nabaklan sang 3,200 peso nga balor sang iligal na droga.
Suno kay Darroca kalakip sa ila nga gin aresto ang anum ka ibap pa nga nadakpan naga gamit sang iligal nga droga kag naga bisita sa drug den.
54,400 pesos nga balor sang iligal nga droga ang kabilugan nga na-recover sang operatiba.
Suno kay Gallego, iya pa nga gina pat-od as of press time ang employment status sang natungdan nga empleyado kasubong man kun ano gid ang kaso nga gina atubang sini.
“Ginasulit-sulit ko gid na pirme, gina pabalo ko gid sa tanan nga government employees nga dapat mag palayo sa illegal drugs. Kun mag involve dira ang isa ka pamilya dala gid tanan, amo nga gina discourage nga dapat indi mag intra sa iligal nga droga”, suno kay Gallego.