Negatibo ang paraffin test result sang tatlo ka mga ginakabig nga persons of interest sang PNP sa pagpatay sa kay Police Staff Sergeant Lernie Alacha. Ang tatlo nga nag negatibo sa paraffin test amo ang pito ka tuig nga bata nga gina tudlo sang iya iloy nga nagtiro kag nakapatay sa iya amay nga pulis, kag isa ka dose anyos pa gid nga bata.
Suno sa kay Police Captain Judesses Catalogo ang Spokesperson sang Negros Occidental Police Provincial Office , indi conclusive ang nasambit nga resulta agud matumod kun ano gid ang matuod nga natabo. May ginahulat pa sila nga mga ebidensya gikan sa Scene of the Crime Operatives kag autopsy resulta sa bangkay sang pulis. Dugang pa niya magalunsar man sang separado nga imbestigasyon ang NOCPPO angut sa kamatayon sang pulis kag ila nga tipunon ang mga pahayag sang mga persona nga nakakilala sa biktima kag sang iya pamilya.
Abril 27 sang nag inaway ang pulis kag ang iya live in partner sa ila balay sa Barangay Andres Bonifacio sa Sagay City. Gin-alegar sang live in partner sang pulis nga na agaw sang pito ka tuig nga bata ang pusil nga dal-on kun tani sang magulang sa pihak balay. Ginsulod niya ang naga inaway niya nga amay kag iloy kag gintaya ang pusil sa iya amay kag gintiro ini nga ginhalinan sang kamatayon sang pulis.