Nagdangat sa masobra sa 20,000 ka pamilya ukon mga 65,000 ka persona ang apektado sang southwest monsoon sa Negros Occidental.
Isa naman ka bata ang gin-report missing.
As of press time, padayon ang pag patigayon sang search and retrieval operation sang Coast Guard kag Sipalay City DRRM sa 14 anyos nga bata nga na missing.
Sa report sang CDRRM mga las 2:30 sang hapon sang Domingo sila ang nag responde sa drowning incident sa Campomanes Bay sa Brgy Maricalum.
Bisan pa nga malain ang panahon ang apat ka mag utod kag mag palakaisa nga naga pang edaron 13 tubtob 17 anyos ang nagdesisyon nga mag paligo sa baybay ugaling sila ang na anod sang mabaskog nga balod.
Tatlo sa ila ang na rescue.
Samtang, suno sa PDRRMO, as of September 15, 7pm nila nga report, may 2,981 ka pamilya ukon 10,145 ka persona ang naga pabilin sa mga evacuation center sang nag kalain lain nga banwa kag siudad sa probinsya.
Suno kay Irene Bel Plotena ang pamuno sang PDRRMO, wala anay sila gintugutan sang ila nga mga LGU nga magbalik sa puluy-an subong nga adlaw bangud sang gina paabot pa nga heavy to intense rains.
May mga balay man nga ginreport nagkalaguba – pito ang totally destroyed kag 85 naman ang partially damaged.
Nagdangat naman sa 15.7 million ang ginreport kahalitan sang pag baha kag mabunok nga ulan sa high value crops kag maisan.
Sa fisheries masobra sa 398,000 ang gin-report kahalitan.
Samtang may gin-report man nga landslide sakop sang Magtanday, Brgy Camindangan sa Sipalay City.
Padayon ang pag abiso sang PDRRMO sa publiko nga maghalong kag mag aligmat.