1,000 ka mga ido kag kuring labi na mga layaw target nga makapon sang Bacolod LGU sa sini tuig.
Antes pa man nagbukas ang Robinsons Place Bacolod sa mga customers nagdagsa na ang pila ka mga fur parents dala ang ila mga hinuptanan nga ido kag kuring para maka-avail sang libre nga kapon.
Ginpahayag ni Assistant City Veterinarian Dr. Jec Cabuguason ang nahauna nga libre kapon program pamaagi sang Bacolod LGU agud nga mapahagan-hagan ang kadamuon sang strays sa siudad kag mabuligan ang mga pet owners sa ila pagtatap sa ila mga hinuptanan.
Upod sa grupo sang animal welfare group, target sang siudad nga makapon ang 1,000 ka mga ido kag kuring, ilabi na ang mga na-rescue karon nga tuig.
Nagbulig pa sa libre kapon program ang pila ka mga volunteers pareho na lang ni Lin-ay sang Negros Kyla Rose Romarate nga isa ka animal rights advocate.
Kabahin sa nagpadulong sa mall ang pamilya ni May Klaire Maniego dala ang ila ido nga si Summer, isa ka rescue nga ila gin-adopt.