Isa ka 6-wheeler ang nahulog sa overlfow sakop sang New Stockyard sa Brgy. 1 sa banwa sang Moises Padilla, Biyernes sang hapon.
Suno kay Reynald Horegue, ang head sang Moises Padilla Local Disaster Risk Reduction Management Office, may karga nga 185 ka sako sang abono gikan sa Department of Agriculture ang truck kag padulong ini sa Barangay Quintin Remo.
Suno kay Horegue may nagasinyas man sa truck sa pagtabok sa overflow pero na alang-alang ang driver.
“Bali ang gutter indi na kitaon sa driver. Kag ang gin agyan niya naglaban sa right side lapit sa dalagdagan. Ginasinyasan man siya sg ara sa overflow nga mag-manuever sa left. Paglapak niya accelerator nagwahig ang buli sg truck tungod sang danlog siguro nga spillway kg current sg tubig”, suno kay Horegue.
Wala man sang may gin-report nga nasamaran sa insidente.
Natalana kuntani ipanagtag ang abono sa mga mangunguma paagi sa Municipal Agriculture Office.
Sa inisyal nga impormasyon sang LDRRMO sa 185 ka sako, may 56 ka sako sang abono nga na damage.
Suno kay Horegue, as of this posting, padayon pa nga naga assist ang team sa pag-recover sang truck.
Taga Brgy. Magallon Cadre naman ang tag-iya sang truck.