Anum ang napatay tuga sang pag-ulan kag pagbaha nga dala sang habagat kag gin pabaskog naman ni bagyo “Crising” sa Negros Occidental.
Sa report sang Provincial Disaster Risk Reduction Management Office, tigayon nakit-an ang bangkay sang 30 anyos nga mangingisda nga si Glen Francisco Trejero nga taga Old Sagay, Sagay City sang Domingo.
Na missing siya sadtong Hwebes matapos mag palawud.
Sang Domingo man nakit-an, ang bangkay sang 44 anyos nga si Mejohn Cordero nga taga Brgy Cabadiangan sa Himamaylan City.
Na-recover sang mga nag patigayon sang retrieval operation ang iya nga bangkay nga naga utaw-utaw sa Pangiplan River sa Barangay Payao sa Binalbagan.
Na missing si Cordero sang Biyernes matapos nga mahulog sa overflow sa Biao sa Binalbagan.
Sang Sabado naman, na-anod sa makusog nga daludo sang tubig samtang naga tabok sa overflow sa Sitio Mangahoykahoy sa Brgy Santol sa Binalbagan ang 12 anyos nga si Daniel Agustin kasunod sang pag atake sang iya nga epilepsy.
Ang ika apat naman suno sa PDRRMO amo ang 84 anyos nga isa ka person with disability nga nalumos sa first floor sang iya nga balay sa Sitio Bakyas sa Barangay San Jose sa Binalbagan matapos nga ginbaha. Wala nakaluwas si Asuncion Subong.
Sang Hwebes isa ka kabulig sa balay kag ang pintor nga nag tinguha mag bulig sa iya ang napatay matapos nga makuryente sa Brgy Talacagay sa Hinoba-an.
Ang mga biktima ang ginkilala nga sanday Jornalyn Omaque, 36 anyos nga taga Basay sa Negros Oriental kag Florante Janoy, 40 anyos kag isa ka pitor gikan sa brgy. Talacagay.
Nagapanghalay sang iya nga nilabhan si Omaque sa balay sang iya nga amo sang iya nga natandog ang halayan nga naka contact man sa live electrical wire.
Samtang, tigayon na nga nag subside ang tubig baha nga nag igo sa 18 tanan ka mga banwa kag siudad sa probinsya dala sang apat ka adlaw nga wala untat nga pag ulan.
As of press time may 811 na lang ka evacuees ang nabilin sa mga evacuation center, gina paabot nga ini sila ang tigayon makapauli subong man nga adlaw.
Ang mga nabilin suno kay PDRRM Officer Irene Bel Plotena ang mga nagub-an sang mga balay.
