Pagkaigo sang stray bullet sa ulo ang ginkamatay sang anum ka tuig nga bata sa nagluntad nga engkwentro sa tunga sang mga soldado sang 62nd Infantry Battalion kag mga rebelde sang New People’s Army sa banwa sang Moises Padilla, Martes nga adlaw.
Sa post, ginsiling ni Moises Padilla Vice Mayor Felix Mathias Segundo Yulo, nga isa ka Grade 1 student sang Agogolo Elementary School ang napatay nga bata.
Nagpadulong sa punerarya kagab-i ang bise alkalde agud maghatag sang bulig pinansyal sa pamilya sang biktima.
Base sa report, nagbayluhanay sang lupok ang katapo sang 62nd IB kag kapin 25 ka mga rebelde sa Sitio Matal-i, Barangay Quintin Remo sa Moises Padilla.
Wala sang reported nga injuries ukon napatay sa bahin sang pwersa sang gobyerno kag sa mga rebelde.
Nakuha sa encounter site ang 35 ka mga bala sang M16, isa ka empty cartridge sang 40mm, isa ka magamay nga sako sang bugas, cooking utensils kag mga personal nga pagkabutang.
Wala sang may na-rekord nga evacuation sa lugar suno sa PNP.*