Napaslawan nga magfile sang ila SOCE ang mga nagkandidato konsehal sa Bacolod nga sanday anay board member Patrick Lacson, anay konsehal Archie Baribar kag anay councilor Homer Bais.
Suno kay Lacson nagpensar siya nga indi niya na kinahanglan pa magfile sang SOCE bangud lunsay mga suporters niya ang nagkampanya kag nag gasto para sa iya kag wala man siya sang may nagasto sa pagpapili.
Plano ni Lacson nga itugyan na lamang sa iya legal counsel ang pagfile sang SOCE sa campaign finance unit sang Comelec.
Sa Negros Occidental, napaslawan man magfile sang SOCE sa gintalana nga deadline kahapon sanday Ma.Socorro Sibulan nga nagpapili gobernador, Pedro Bolaño nga nagpadalagan board member sa 5th district kag Bernard Ferraris nga nagpapili kongresista sa 3rd district.
Samtang, ang mga nagdalaog naman nga mga kandidato sa local kag national elections gintagaan sang Comelec tubtob nobyembre para mag file sang SOCE.