Hugot nga ginabantayan sa karon sang Sugar Regulatory Administration ang pag atake sang red-striped soft scale insects ukon RSSI nga na-monitor sa anum ka mga lugar sa northern Negros Occidental.
Ang RSSI ang sarang makabuhin sang sugar content sang tubo sa kapin 50 porsyiento suno sa SRA.
Gani nagtukod na sang task force ang SRA nga magapanguna sa paghatag atensyon sa amo nga problema paagi sa paghinyo sang bulig gikan sa Department of Agriculture.
Ini agud matigayon ang pagpatuman sang quarantine measures.
Ginpahayag ni Administrator Pablo Luis Azcona sang SRA nga dapat mangin mabinantayon ang mga sugar farmer ilabi na sa pagbakal sang patdan. Nagapati ang SRA nga gikan sa Luzon ang mga peste kun diin nagapabilin ini sa pila ka mga sugarcane farms.
Ang SRA ang magahinyo man sang bulig gikan sa National Crop Protection Center para sa nagakaigo nga insecticides nga sarang makatapna sang peste sa tubo.