Las sais sang aga ginpa kondisyon na nga daan ni Reynaldo Evangelista ang iya nga storage truck.
Excited siya nga mangin kabahin sang maragtas sang Bacolod.
Kun masami ice cream ang karga sang ila nga mga storage truck, kaina siya ang nag drive sang truck nga gin kargahan sang pinaka una nga mga bakuna contra COVID-19 nga nag abot sa Bacolod.
Area manager siya sang ila kumpanya pero siya ang nag drive bangud naka attend siya sang brieifing kun paano halungan ang mga bakuna.
Pag abot sang PAL nga eroplano impunto las nuebe beinte, gilayon nga gin unload ang mga 6270 ka mga Sinovac vaccines kag ginsaylo sa storage truck.
Pagpagwa sa airport may convoy nga nag upod sa bakuna… mga pulis, army, opisyal sang Bacolod Emergency Operations Center kag City Health Office.
Pag abot sa Bacolod City Government Center gilayon ini nga gin sulod sa cold storage kag gin inventory.
Sa sini nga facility ibutang ang mga bakuna. Ang una nga pagataan sang bakuna mga health workers sang Corazon Locsin Montelibano Memorial Regional Hospital kag Riverside Medical Center.
Sa Domingo masugod ang pagbakuna sa ila kag kun may bilin pa may listahan man nga gin sumite ang iban nga mga ospital sa Bacolod sang ila health workers nga luyag magpabakuna.
Pito kun tani ka mga duktor ang una nga bakunahan kaina sang aga ugaling ang isa ka doctor nagtaas ang blood pressure, wala nag risgo ang eoc.
Si Dr. Hector Gayares Jr. nga chief executive officer sang Adventist Hospitals sa Pilpinas ang isa sa mga una nga bakunahan.
Matapos ang health decalaration kag check up, ginpatigayon ang ceremonial vaccination sa anum ka mga duktor.
Paathag ni Gayares, ang 50 % efficacy sang Sinovac vaccine nga gina siling ang para lang sa mild symptoms.
Si Dr. Michael Sarabia nga presidente sang Negros Occidental Medical Society ang kabahin man sang una nga mga ginbakunahan.
Suno sa iya, sang nahibaluan niya nga ang suma cum laude sang ila nga batch sa UP ang pinaka una nga doctor nga nabakunahan sang Sinovac sa Pilipinas, nag desisyon siya nga magpabakuna man.
Suno kay Bacolod City Mayor Evelio Leonardia, ang Bacolod City ang pinaka una nga siudad nga may COVID-19 positive sa Western Visayas kag karon ang Bacolod man ang pinaka una nga siudad sa Western Visayas nga may nabakunahan kontra COVID-19.
May mga konsehal man tani sang Bacolod nga maluyag nga magpa bakuna sa sinovac ugaling wala gindayon bangud sa panugayn ni Sec. Carlito Galvez , ang vaccine czar, nga medical health workers ang prayoridad sang una nga batch sang bakuna nga nag abot sa Pilipinas.