May anum ka mga banwa kag siudad sa Negros Occidental ang nalab-utan sang ash fall kasunod sang minor explosive eruption sang bulkan Kanlaon kaina sang aga.
Mga pumuluyo gina abisuhan nga mag monitor kag magsunod sa panugyan sang ila nga mga LGU.
Suno kay Irene Bel Plotena ang labing apektado sang ash fall amo ang La Carlota City bangud sang direksyon sang hangin.
12 sa 14 ka mga barangay sang La Carlota ang nag-report sang light to heavy ash fall.
17 naman ka mga barangay sa kaiping nga banwa sang Pontevedra ang may report sang light to heavy ash fall.
Suno kay Mayor Jose Maria Alonso napanimahuan man ang asupre.
24 ka mga barangay sa Hinigaran ang apektado man sang ash fall sa report sang PDRRMO.
Pila sa mga barangay sa La Castellana, Bago kag San Enrique ang may reported ash fall.
Gina abisuhan ang mga residente nga mag gamit sang face mask.
Sa mga lugar nga may heavy ash fall, mas maayo kun mag tenir sa mga puluy-an kag ipaiway ang pag gwa sa tagsa ka mga balay.
Nag padala naman sang 12,000 ka mga face mask ang PDRRMO bilang dugang nga supply sa mga apektado nga LGU.
Sa report man sang PDRRMO, ang La Carlota, La Castellana, Pontevedra kag Bago ang nag suspend sang klase sa tanan nga level. Nag shift naman gikan sa face to face padulong sa modular classes ang banwa sang Isabela.
Halos isa ka oras ang explosive eruption sang Kanlaon nga nagsugod 5:51 sang aga kun sa diin 4,000 meters ang kataason sang plume.
Suno kay Plotena ang mga nakit-an nga naga aso-aso sa mga slopes sang bulkan mga large ballistic fragments na nga nabuga ukon gikan sa bulkan.
Temporaryo naman nga gin paiway ang window para sa mga mangunguma nga makasulod sa 6 km danger zone para kuntani maka atender sa ila nga mga pananum.
Samtang, wala sa karon sang may gin-report nga nagdugang sa mga evacuees. Naga pabilin sa Alert Level 3 ang bulkan.